"මිනිසා සංස්කෘතික සත්ත්වයෙකි." මෙය හුරු පුරුදු කියමනකි. මෙහිදී අප පළමුකොට විසඳාගත යුතු ප්‍රශ්නය නම් සංස්කෘතිය යනු කුමක්ද? යන්නයි. සංස්කෘතිය කෙරෙහි සිය ගණනක් නිර්වචන ඉදිරිපත් වූවත් සත්‍යය නම් අද වනතෙක් සංස්කෘතිය යන්නට නිශ්චිත වූ නිර්වචනයක් ලැබී නොමැති බවයි. එතරම් ම සංස්කෘතිය යන්න පුළුල් ව පැතිරුණු ක්ෂේත්‍රයකි.
'සංස්කෘතිය' යන වචනය සංස්කෘත භාෂාවෙන් නිපන් තත්සම වචනයකි. සංස් + කෘති යන වචන ද්විත්ත්වය සන්ධි වීමෙන් සංස්කෘතිය යන වචනය නිර්මාණය වී ඇති අතර 'මනා කොට සිදුකරන ලද්ද' යන අර්ථය ගෙනදෙයි. එහෙත් එයින් අදහස් කෙරෙන ප්‍රධානතම අර්ථය වනුයේ යම් ජන කොට්ඨාසයකට අනන්‍ය වූත් පැවැත්මට අදාළ චර්යාධර්ම පද්ධතියක් බව සැලකීම යුක්ති යුක්තය.
ඉංග්‍රීසි භාෂාවේ යෙදෙන Culture යන වචනය සංස්කෘති යන්නට පර්යාය වශයෙන් යෙදේ. එහි දළ අර්ථය වගා කිරීම හා සම්බන්ධ වූවත් පොදුවේ ගෝලීය සමස්ථ මානවයාගේ ජීවන ක්‍රමය හැඳින්වීමට භාවිත කරනු ලබන්නේ ද එම වදනයි. සංස්කෘතිය පිළිබඳ අධ්‍යයනය කිරීම ලෝකයේ බොහෝ අධ්‍යයන ආයතනයන්හි අතිශය ජනප්‍රිය විෂය ක්ෂේත්‍රයකි.
සංස්කෘතිය මූලික වශයෙන් විභේදනය කරනු ලබන්නේ ස්පර්ශ සංස්කෘතිය (Intangible culture) හා අස්පර්ශ (Intangible Culture) සංස්කෘතිය වශයෙනි. භෞතික ව ගෝචර වන සංස්කෘතිකාංග පිළිබඳ හැදෑරීම ස්පර්ශ සංස්කෘතිය යටතට ගැණෙන අතර භෞතික ව ප්‍රතිරූපණයක් කිරීමට අපහසු සංස්කෘතිකාංග අස්පර්ශ සංස්කෘතිය ලෙස ද විග්‍රහ කෙරේ. කෙසේ නමුත් සරල ව ගත් කළ සංස්කෘතිය වනාහී 'මානවයාගේ පැවැත්මේ අතීතය , වර්තමානය , අනාගතය පිළිබඳ කිසියම් මානවීය දෘෂ්ටියකින් විග්‍රහ කෙරෙන්නක් 'ලෙස අර්ථ දැක්විය හැකිය.
එක් එක් කාලයේ දී ' තම්බපණ්ණි,සීහල භූමි , හෙළ භූමි , තැප්‍රොබේන් , සෙරන්ඩිබ් ,සිලෝන් , ලංකා ' යන නාමයන්ගෙන් හඳුන්වන ලද ශ්‍රී ලංකා දිවයින ආසියානු මහද්වීපයට අයත් වන ඒකීය රාජ්‍යයකි. එසේම ශ්‍රී ලාංකේය සංස්කෘතිය ශතවර්ෂ ගණනාවක අතීතයකින් යුතු ව , සාංස්කෘතික ලාක්ෂණිකයක් වන ගතිකත්වය අනුව වෙනස් වෙමින් අනාගතය කරා පියනගන සමස්ත ආසියානු මානවයින්ගේ දිවියේ තවත් එක් පැතිකඩක් නියෝජනය කරයි.
මේ අන්තර්ජාල අවකාශය විවෘත වන්නේ ඒ අපූරු මානවයින්ගේ ජීවන තොරතුරු ගවේෂණය කිරීමටයි. ඒ ඇසුරෙන් සමස්ත පෘථිවි වාසින්ගේ නියමාකාර අවධානය ට පාත්‍ර නොවූ තවත් මානව සංස්කෘතියක තතු එළිපෙහෙළි කිරීම මෙහි එක් අභිප්‍රායයකි.
සංස්කෘතික උරුමයක් ලෙස සංගීත විෂය ක්ෂේත්‍රය පිළිබඳ අධ්‍යයනය කරන්නෝ ලෝකයේ විරල නොවෙති. එය සංස්කෘතිය යන මාතෘකාව තරම් ම විචිත්‍ර වූවකි. එහෙත් දේශීය වශයෙන් එම විෂය ක්ෂේත්‍රය පිළිබඳ සාකච්ඡා වී ඇත්තේ සීමා සහිතව ය. කාලානුරූපීව ලාංකීය සංස්කෘතිය ද දේශීය අනන්‍යතාවයන්ගෙන් ද හා ලෝක මට්ටමේ සම්ප්‍රදායයන්ගෙන් ද ආභාසය ලබමින් ස්වාධීන සංස්කෘතිකමය සංගීතයක් බිහිකර ගැනීමෙහි උත්සාහයක නි‍යැළී සිටියි. එසේ ගොඩනැගෙන ශ්‍රී ලාංකේය සංගීතය සංස්කෘතිකමය ඇසකින් දකින විද්‍යුත් අවකාශයයි ,
CULTURE AND MUSIC
Godak watinaw
ReplyDelete